Bjarstýnispokar á Amtsbókasafninu - gjöf sem gefur

Amtsbókasafnið á Akureyri lætur sig umhverfismál varða og vill gjarnan draga úr notkun á plastpokum. Í þeirri viðleitni hefur safnið því meðal annars brugðið á það ráð að auglýsa eftir pokum frá almenningi með ágætum árangri. Nýlega barst safninu þó óvæntur liðsauki í baráttunni gegn plastinu þegar hópur vaskra kvenna í Eyjafirði, Laugalandsskvísur eins og þær kalla sig, bauðst til að sauma taupoka fyrir safnið, gestum þess til handa.

 Laugalandsskvísur ganga vasklega til verka. 

Laugalandsskvísur ganga vasklega til verka. 

Pokarnir eru vandaðir að gerð. Unnir úr gömlum en slitsterkum efnum sem eitt sinn átti að nota í gardínur áður en tíminn úrskurðaði þau of glaðleg. Böndin eru vandlega saumuð á því pokunum er ætlað að endast. 

Laugalandsskvísur kalla þá gjarnan bjartsýnispoka, því þær vona að pokarnir veiti öðrum innblástur.

 Vandað til verka. 

Vandað til verka. 

 Gömul efni öðlast nýtt líf.

Gömul efni öðlast nýtt líf.

Nú eru bjartsýnispokarnir komnir á Amtsbókasafnið og hanga í afgreiðslunni, tilbúnir til notkunar. Safngestir geta því gripið vandaðan bjartsýnispoka undir bækurnar og annað hvort haldið áfram að nota pokann eða skilað honum aftur á safnið þegar bókunum er skilað. „Aðalatriðið er að pokarnir verði notaðir“, segir starfsfólk Amtsbókasafnsins.